حضرت اقدس مسیح موعودعلیہ السلام کو خدا تعالیٰ نے ایک خاص مشن کے ساتھ دنیا میں بھیجا اور آپ ایک فتح نصیب جرنیل کی طرح ہر میدان میں فائز المرام ٹھہرے۔ علاوہ روحانی لحاظ سے ایک ترقی یافتہ اور عارف باللہ ، علم دوست جماعت پیدا کرنے کے، آپ کا ایک اورغیر معمولی کارنامہ دنیا میں ایک خاص الخاص علمی انقلاب عظیم بھی پیدا کرنا تھا، جس کا تذکرہ اس زیر نظر کتاب میں موجود ہے۔ مولانا موصوف نے نہایت عرق ریزی سے اس عظیم الشان علمی انقلاب کی جزئیات اور تفصیلات کا ایمان افروز مطالعہ کیا اور بطور نمونہ ایشیا اور شرق اوسط کے نامور علماء اور مفکرین کے کلام سے وہ نمونے پیش کئے کہ کس طرح یہ زمرہ علماء حضرت اقدس مسیح موعودعلیہ السلام کے پیش کردہ بے داغ اور مضبوط علمی منہج کی پیروی کرنے لگے ہیں۔ مسئلہ ناسخ منسوخ، عربی ام الالسنۃ ہے، کسر صلیب، تکلم فی المہد، وفات مسیح، خلق طیور، یاجوج ماجوج، دجال، رفع الی اللہ وغیرہ پر منتخب اقتباسات کا یہ مجموعہ یقیناً قابل قدر ہے۔